الشاعر حسن الجندي يكتب((حنين للماضي))

(حنين للماضى)
تاخدنى الذكرى للماضى
وأيام .......حلوه وهنيه
وباترّحم.. عليك يا زمان
أيام راحت ومش جايه
بنات بتلعب........ الأولى
وصبيان عسكر وحراميه
وناعسه شايله... بلّاصى
عيونها كحيله.... مصريه
وجوزها... على المحرات
أسد بشهامه .......عربيه
وست الكل........... بتغنّى
ف الشهر... تلات وصلات
أغانيها............ ترد الروح
مليانه آهات......... وحنيه
وقلّه غطاها نحاس بتدلّع
على شباك...... ف عصريه
بنشرب منها .....ميه زلال
بطعم الورد........... مسقيه
وقشر لارنج.......... متعتّق
مع مش قديم ف زراويه
وأسامينا كانت...... حنفى
وست الدار.......... وشلبيه
الله يرحم...... بابور الجاز
وبستلّه معاها عصايه لغليه
وطشت غسيل وخصر نحيل
ناقعه غسيلها ......ف الميه
ومدّق التوم..... وفلة خيش
وبدل التلاجه ..........نمليه
وسرير حديد باربع عماويد
حوليه..... عسكر وناموسيه
وزفير نهضه..... وتيل ناديه
ودّّمور خيوطه متينه وقويه
وأحلامنا كان سقفها واطى
بسيطه........ وسهله وعاديه
وعلاجنا كان قرصين أسكين
وشربة زيت وحبة حلبه مغليه
والمعده................ تهضم زلط
والصحه.......... جامده وعفيه
إيه بدل......................الأحوال
وغيّرك.........................يازمان
خلّاك..........................تعاندنى
وتبيع ..............وتشتري فيّا
(وعجبى)
(حسن الجندى)