بص ودقق كدا ف الصورة ..نص عامية مصرية تكتبه الرائعة(ياسمين عبود)

بص ودقق كده ف الصوره
هرسم مين
هرسم وش بيضحك جدا
بس حزين
حتى عيونه مفتحه لكن
مش شايفين
هرسم رقعه ف وسط هدومه
وع الطرفين
وارسم حلم ياما اتمرجح
جوه العين
رجله بتجري يمكن تفرح
مش لاحقين
هرسم شعر ابيض ولسه
ف العشرين
بص ودقق حاول تعرف
برسم مين
انا مش واحد لا والله
انا ملايين
نسيوا ارواحنا نسيوا ان
احنا بنيأدمين
قولنا نهرج يمكن ننسى
اننا ضايعين
يمكن نوصل بعد ماعشنا
سنين تايهين
قمنا رسمنا ضحكه جميله
بالتلوين
بس ازاي هنداري دموع
مننا نازلين
ياما مثلنا وكنا حقيقي
صحيح شاطرين
ياما ضحكتوا علينا وقولتوا
ياا حلوين
هم يضحك هم يبكي واحنا
مثال بقى للاتنين
#ياسمين عبود