الشاعر حسن الجندي يكتب(بلاها عتاب)

(بلاها عتاب)
باعتب عليك يا زمن
ويفيد بإيه العتاب
ما اللى إنت عايزه حصل
واتفرقوا............الأحباب
وعشنا لحظة أمل
أتاريه أمل كدّاب
نوّر علينا القمر
وف لحظه سابنا وغاب
طوّل غيابه ياليل
وسابلى شوق وعذاب
وعشت من غير أمل
أستنى منه جواب
بين الضباب اختفى
وتاه ف وسط سحاب
وروحه فوق ف السما
وجسمه تحت تراب
باعتب عليك يا زمن
وابكى حزين ع الغاب
وكل مامسك أمل
ألاقيه ف ايدى سراب
والموت علينا افترى
خطفنا شيب وشباب
عمّال يخلّص علينا
ما بين ذهاب وإياب
ومن كؤوس الضنا
نشرب أمر شراب
يا دنيا عيب إختشى
وخدينا بالأسباب
ورّينى بسمة أمل
أو اعمليلي حساب
وابقى ف أوان العسل
سبيلي مرّه مناب
واللا خلاص أخرتك
خراب وقطع رقاب
والواطي واطي يادنيا
ولا يستاهلش.......عتاب
(وعجبي).
(حسن الجندي)