حكم التاريخ بجنون قيس و كان على ليلى حكم التجنى ..
فماذا كانت ستقول ليلى ؟ اذا هى تركت يوما تغنى ؟
حوار بين قيس و ليلى بالعامية 😊
كتبته مع جدو ❤
Hassan Algendy
( قيس ) بقلم حسن الجندى
حرام عليك يا هوى
يا مفرق الأحزان
قضّيت حياتى شجن
لا أهل ولا خللان
غرقتنى ف بحر الأمل
وسبتنى........عطشان
يهوى حبيبى المنام
وابات أنا سهران
خايف من اللى جاى
وبابكى ع اللى كان
كاس الهنا..... فاضى
وكاس العذاب مليان
شربته وانا راضى
بالسهد...والحرمان
أخطب أنا ودك
وتسيبنى للأشجان
ومهما طال صدك
حاصبر على الحرمان
عذبتنى ف هواك
إرحم دانا انسان
وقصتى ف الهوى
ضاعت معاك يازمان
( ليلى ) بقلم خلود الجندى
بلاش تلوم الهوى
حرام....ماتظلمهوش
من يوم ماكنا سوا
وانت....ماتعرفهوش
فى البحر ضاع حبنا
أمل وراح..........مننا
غريق...ومالحقتوش
يامسهر عيونى معاه
يا واعدنى أكون وياه
لما طلبت .........لقاه
دورت......مالقتهوش
لو كاس الهنا فاضى
أنا برضه ماشربتوش
وهو كاس العذاب
أنا مش قاسمته معاك
واللا......ماقاسمتوش
ياللى نسيت حبك
إسأل بقى قلبك
إن كنت ماسألتوش
ازاى عايزنى ارحمك
وقلبى.... مارحمتوش
ليست هناك تعليقات:
إرسال تعليق